Zëvendësministri i Punëve të Brendshme, Astrit Iseni, ka kërkuar zbardhjen e plotë të pretendimeve për dhunë policore ndaj dy qytetarëve më 7 tetor në Shkup, duke bërë të ditur se rasti po hetohet nga Kontrolli i Brendshëm.
Iseni theksoi se, nëse konstatohen shkelje, do të ketë përgjegjësi, duke nënvizuar se uniforma policore nënkupton detyrimin për të mbrojtur qytetarët dhe për të respektuar ligjin.
“Çdo keqpërdorim i autoritetit cenon besimin dhe dinjitetin e institucionit”, ka shkruar Iseni në një status, duke theksuar përkushtimin për një polici profesionale dhe llogaridhënëse.
Ai shtoi se qytetarët do të njoftohen me kohë për rezultatet e hetimit dhe masat që do të ndërmerren.
Pretendimet kanë të bëjnë me një rast të raportuar më 7 tetor në Shkup, ku dy qytetarë dyshohet se janë përballur me dhunë nga pjesëtarë të policisë.
Rrethanat e ngjarjes dhe përgjegjësia eventuale e personave të përfshirë pritet të sqarohen përmes hetimit të Kontrollit të Brendshëm në kuadër të Ministrisë së Punëve të Brendshme.