Blendi Hodai nga Forumi për Ndryshime në Arsim ka komentuar pagesën që bëjnë studentet për transport në disa vende, duke e krahasuar me atë që bëjnë studentët në Maqedoninë e Veriut.
Hodai në reagimin e tij potencon se krahasuar me disa shtete që ai i përmend në analizë, një student në Maqedoninë e Veriut paguan dy apo tre herë më shumë për të arritur në universitet.
Reagimi i plotë:
“Një student në Gjermani paguan rreth 38 euro në muaj dhe udhëton me transport rajonal në të gjithë vendin.
Në Slloveni, një student paguan vetëm 25 deri në 55 euro për transport ndërqytetës, sepse pjesën tjetër e mbulon shteti.
Në Maqedoninë e Veriut, një student nga Tetova paguan mbi 105 euro në muaj vetëm për të shkuar në Shkup.
Nga Kumanova, rreth 100 euro. Nga Gostivari, rreth 130 euro.Pra, në një vend ku pagat janë disa herë më të ulëta se në Gjermani apo Slloveni, studenti paguan dy apo tre herë më shumë vetëm për të arritur në universitet.”
Kujtojmë se vetëm muajin e kaluar çmimet e transportit u rritën sërish, duke prekur buxhetin e punëtorëve dhe studentëve që udhëtojnë nga qytetet e tjera të vendit drejt Shkupit.