Presidenti ukrainas Volodymyr Zelensky paralajmëroi disa orë përpara se të ndodhnin sulmet se Rusia po përgatitej për një “goditje masive”, dhe më pas një valë sulmesh ajrore ruse goditi disa qytete ukrainase, duke vrarë të paktën 13 persona, mes tyre edhe fëmijë.
Sulmet u shtrinë nga qyteti qendror Kryvyi Rih deri në Kyiv dhe Lviv, ndërsa Polonia ngriti në ajër avionë luftarakë për të mbrojtur hapësirën e saj ajrore pas intensifikimit të sulmeve pranë kufirit.
Në Kryvyi Rih, qytetin e lindjes së Zelenskyy-t, një raketë balistike Iskander-M goditi një shtëpi private në periferi të qytetit, duke vrarë gjashtë persona, përfshirë dy vajza të moshave 5 dhe 12 vjeç.
Kreu i administratës ushtarake të qytetit, Oleksandr Vilkul, tha se raketa ishte lëshuar nga rajoni rus i Voronezhit dhe goditi një banesë ku jetonte një familje e madhe. Tetë persona të tjerë u plagosën.
Viktima të tjera u raportuan në rajonet Dnipropetrovsk dhe Poltava, ku humbën jetën edhe dy fëmijë.
Në kryeqytetin Kyiv, autoritetet konfirmuan një viktimë, ndërsa kryebashkiaku Vitali Klitschko njoftoi për zjarre në disa zona të qytetit. Ai u bëri thirrje banorëve të qëndronin në strehimore, duke paralajmëruar se rreziku i sulmeve të tjera vazhdonte.
Në Lviv, në perëndim të Ukrainës pranë kufirit me Poloninë, raketat ruse dëmtuan ndërtesa banimi. Ekipet e shpëtimit punuan për të nxjerrë persona nga rrënojat, ndërsa autoritetet raportuan 26 të plagosur.
Para sulmit, Zelenskyy kishte paralajmëruar qytetarët ukrainas se Rusia kishte përgatitur një operacion të madh ajror.
“Rusët kanë përgatitur një sulm masiv prej disa ditësh dhe ka shumë gjasa që goditja të kryhet sonte,” tha ai, duke kërkuar nga banorët në të gjitha rajonet që t’i kushtonin vëmendje alarmeve ajrore.
Pas nisjes së sulmeve, Polonia aktivizoi avionë luftarakë dhe sistemet e mbrojtjes ajrore si masë sigurie. Ushtria polake tha se avionët dhe një avion paralajmërimi të hershëm kishin nisur operacionet, ndërsa radarët dhe sistemet tokësore ishin vendosur në gatishmëri.
Autoritetet polake raportuan gjithashtu se një objekt i paidentifikuar ishte zbuluar në hapësirën ajrore të vendit dhe më pas ishte gjetur një zonë e mundshme rrëzimi pranë fshatit Tarnawa-Kolonia në rajonin e Lublinit.
Zelenskyy përsëriti kërkesën ndaj aleatëve perëndimorë për furnizime shtesë me raketa të mbrojtjes ajrore, duke thënë se mbrojtja e jetëve të civilëve varet nga aftësia e Ukrainës për të ndaluar sulmet nga ajri.
Ndërkohë, Rusia raportoi gjithashtu sulme me dronë ukrainas në territorin e saj. Një magazinë e kompanisë së tregtisë online Wildberries në qytetin Penza u përfshi nga zjarri pas një sulmi me dron, sipas autoriteteve lokale. Një person u plagos dhe rreth 200 persona u evakuuan.
Një tjetër zjarr u raportua në një qendër logjistike të Wildberries në qytetin Sarapul, në rajonin rus të Udmurtisë, pas një sulmi të dyshuar me dron.