Sipas Kombeve të Bashkuara, Evropa u bë destinacioni i ri kryesor për kokainën. Kjo drogë, që dikur lidhej me vizitorët e pasur të festave të natës, u bë e përhapur gjerësisht, shkruan “Financial Times”.
Sipas të dhënave të Agjencisë për Drogën e Bashkimit Evropian, midis viteve 2014 dhe 2024, çmimet në rrugë ranë, mesatarisht, me 18 për qind, ndërsa pastërtia e kokainës u rrit me 44 për qind. Vetëm vitin e kaluar, sasia e gjurmëve të kokainës në ujërat e ndotura të qyteteve u rrit me më shumë se një të pestën. Agjencia e vlerësoi vlerën e tregut evropian në 11,6 miliardë euro në vitin 2021, ndërsa Majkl O’Salivan, ish-drejtor i Qendrës për Analizë dhe Operacione Detare kundër Narkotikëve, beson se sot vlen rreth 15 miliardë euro. Autoritetet evropiane e intensifikuan luftën kundër kontrabandës duke investuar në sigurinë e porteve dhe bashkëpunim më të ngushtë gjyqësor, por grupet kriminale ende janë një hap përpara, thekson FT.
Një oficer i marinës irlandeze, i cili kërkoi të mbetet anonim, vlerëson për gazetën se organet e zbatimit të ligjit sekuestron “ndoshta 10 për qind” të kokainës që dërgohet në Evropë. FT thekson se kontrabanda e kokainës në Evropë filloi seriozisht në vitet 1980, kur kartelat kolumbiane u përpoqën të zgjeroheshin jashtë tregut të ngopur amerikan. Në fillim përdornin jahte dhe varka me motor, por nga vitet 1990, për shkak të sasisë së rritur të drogës, i zëvendësuan me kontejnerë me mallra si fruta, si dhe me metoda gjithnjë e më të zgjuara, duke përfshirë edhe dërgimin e drejtpërdrejtë të “nëndetëseve për drogë” në Evropë. Kontrabandistët e përzien kokainën në pluhur me ushqim, plastikë, tekstil, karton, madje edhe me lëkurë lope për ta maskuar gjatë transportit, dhe më pas e izolojnë në laboratorë kimikë të paligjshëm. Një nga metodat përfshin përpunimin kimik të drogës dhe aplikimin e saj mbi qymyr druri.
Gjatë dekadës së fundit, vendet evropiane sekuestron sasi të mëdha kokaine, veçanërisht në portet e mëdha si Roterdami në Holandë dhe Anverpeni në Belgjikë, por tre vitet e fundit ka një rënie të madhe, që shumë e shohin si shenjë se masat e rritura të sigurisë i largojnë kontrabandistët nga portet e mëdha, përcjell Pa Censurë.
Prandaj, grupet kriminale po kthehen drejt transportit të mesëm-atlantik si alternativë, duke përdorur GPS dhe teknologji satelitore. Dërgesa të tilla mund të përfshijnë anije peshkimi ose anije tregtare të mëdha “mëmë”, që e transferojnë drogën në anije më të vogla. Ndonjëherë ato transportojnë edhe mallra me vlerë të ulët, si traktorë të përdorur, që udhëtimi të duket si operacion legjitim biznesi. Një mundësi tjetër është që anijet e peshkimit, skafet ose gjysmënëndetëset e kontrolluara nga grupet kriminale, që transportojnë vetëm drogë, të takohen në det për transferim. Kontrabandistët, gjithashtu, i zhysin kontejnerët, të cilët më vonë hapen me ndihmën e një kohëmatësi, duke lejuar që droga të dalë në sipërfaqe dhe të nxirret. Në organizimin e transportit dhe shpërndarjes së kokainës, së bashku me kartelat e mëdha braziliane dhe meksikane, rol të rëndësishëm luajnë edhe grupe të ndryshme kriminale ballkanike.