Do ta përfundojë pjesëmarrjen në Debat Plus në Klan Maqedoni dhe pa humbur kohë do të niset drejt Malësisë së Tetovës – në Shipkovicë, fshat të cilin e quan të vetin, kurse banorët bashkëfshatarë.
Nuk hezitoi të thotë se dikur, Shipkovica ka qenë qendër e diplomacisë botërore.
“Bukë, krypë e zemër”, Shipkovica i ka ndarë me ne. I ka ndarë me UÇK-në” – tha Ahmeti.
Fronti Evropian zanafillën e ka që në vitin 2001 – tha Ali Ahmeti, duke përkujtuar takimet me Arbën Xhaferin e PDSH-së dhe Imer Imerin e PPD-së.
Ali Ahmeti ripërsëriti edhe një herë se legjitimitetin për t`i përfaqësuar shqiptarët në qeveri e jep populli, e jo dikush tjetër.
“Pavarësisht ata që thonë – ky hyn ai del në qeveri. Këto janë përralla me mbret. Qeverinë dhe institucionet i bëjnë ata që kanë mbështetjen e popullit dhe populli të zbret dhe populli të ngarkon” – tha Ali Ahmeti.
S`ka kompromise me zotimet e Frontit Evropian – tha lideri i integristëve, duke përmendur “vijat e kuqe” për qeverinë e ardhshme.
“Vijat e kuqe ne i kemi – anëtarësimi i vendit në BE, korniza për ekonomi dhe vetting dhe duhet që me përkushtim të gjithë të angazhohemi” – tha Ali Ahmeti.
Ditëve të fundit të fushatës, në adresë të BDI-së dhe Ali Ahmetit mbërrijnë mesazhe nga të dy taboret – nga VMRO DPMNE-ja dhe LSDM-ja.
Ahmeti tha se retorika e tyre i takon kohës së vjetër.
“Pushka pas lufte dhe fjala pas Kuvendit nuk kanë vlerë, prandaj le të mësojnë edhe ata kandidatë për president edhe për Kryeministra. Sot kemi nevojë për stabilitet, për paqë dhe siguri” – tha Ali Ahmeti.
Lideri i BDI-së, Ali Ahmeti, tha se zgjedhjet e 8 majit janë një referendum për Maqedoninë e Veriut. Andaj u bëri thirrje qytetarëve që të përcaktohen për rrugëtimin evropian të vendit, në mënyrë që, sic tha, të përjashtohet një herë e përgjithmonë ndikimi rus në këtë nënqiell.