Dogana parandalon importin ilegal të 2.8 tonëve kripë të pajodizuar në Shkup

Doganierët nga Drejtoria e Doganave të Maqedonisë Shkupi 3 parandaluan një përpjekje për importimin ilegal të 2.8 tonëve kripë të pajodizuar, e cila është e ndaluar për import. 

Rasti u zbulua gjatë kontrollit të mallrave të deklaruara si kripë industriale për të cilat, nga importuesi, një prodhues ushqimor, ishte dhënë një deklaratë se do të përdorej për qëllime industriale. Gjatë kontrollit, u përcaktua se ishte kripë e pajodizuar, dhe jo kripë industriale siç thuhej në deklaratë dhe deklaratën doganore të importit.

Sipas legjislacionit të RMV-së, kripa e përdorur në ushqim duhet të jetë e jodizuar për shkak të efekteve të dëmshme në shëndetin e qytetarëve nga konsumimi i kripës së pajodizuar. Janë filluar procedurat përkatëse kundër të dyshuarve, dhe në përputhje me vendimin e marrë nga Agjencia e Ushqimit dhe Veterinarisë, kripa u shkatërrua në deponinë e Drisllës.

Nga Drejtoria e Doganave theksojnë se zbulimi i mashtrimeve doganore me ushqimin është një nga prioritetet kryesore të doganave, me qëllim mbrojtjen e shëndetit të qytetarëve. Për këtë qëllim, vitin e kaluar u nënshkrua një Memorandum Mirëkuptimi për shkëmbimin e të dhënave me AUV, i cili përmirësoi ndjeshëm luftën kundër krimit të lidhur me ushqimin.