Kryeministri i Maqedonisë së Veriut, Hristijan Mickoski, pas takimit me presidenten e Komisionit Evropian, Ursula von der Leyen, deklaroi se vendi mbetet i përkushtuar ndaj anëtarësimit në Bashkimin Evropian, por kërkon një proces të drejtë, të parashikueshëm dhe të bazuar në rregulla të qarta.
Mickoski tha se në takim është diskutuar për reformat, dinamikën e procesit të integrimit dhe sfidat që prej vitesh e ngarkojnë rrugën evropiane të vendit.
“Duam të jemi pjesë e Bashkimit Evropian dhe punojmë me përkushtim për këtë qëllim”, tha Mickoski, duke shtuar se ka ardhur koha që procesi të marrë mbështetje më të fuqishme politike nga institucionet evropiane.
Një pjesë e rëndësishme e bisedimeve, sipas Mickoskit, i është kushtuar marrëdhënieve me Bullgarinë. Ai tha se çështjet e hapura duhet të zgjidhen përmes dialogut, vullnetit të mirë dhe respektit të ndërsjellë.
“Ne nuk kërkojmë që Bashkimi Evropian të mbajë anën e askujt. Kërkojmë të ndihmojë në krijimin e kushteve për një zgjidhje të qëndrueshme evropiane, ku ajo që është dakorduar të jetë e qartë, detyrimet të vlejnë për të gjithë dhe procesi i anëtarësimit të mos hapet përsëri për kushte të reja dypalëshe”, tha Mickoski.
Ai theksoi se çdo zgjidhje duhet të ofrojë siguri se me përmbushjen e detyrimeve mbyllet një fazë dhe hapet rruga për fazën tjetër, pa hapësirë për interpretime apo kërkesa shtesë.
Mickoski foli edhe për reformat e brendshme, duke përmendur sundimin e ligjit, administratën publike, klimën e biznesit, digjitalizimin dhe arsimin.
Sipas tij, agjenda reformuese në kuadër të Planit të Rritjes tashmë po sjell rezultate konkrete, ndërsa integrimi gradual me tregun e përbashkët evropian duhet t’u sjellë qytetarëve përfitime edhe para anëtarësimit të plotë.
Si shembull të integrimit konkret evropian, Mickoski përmendi Korridorin VIII, duke e cilësuar atë si një projekt që lidh integrimin politik me infrastrukturën, tregtinë dhe lidhjen mes njerëzve.
“Ambicia jonë është e qartë: derisa diskutojmë për anëtarësimin, në vend të ndërtojmë një shtet që për nga institucionet, standardet dhe mundësitë ekonomike tashmë funksionon si një shtet evropian”, deklaroi Mickoski.
Në fund të takimit, kryeministri tha se Maqedonia e Veriut dëshiron që procesi evropian të ecë përpara dhe që qytetarët të kenë arsye të besojnë sërish fuqishëm në perspektivën evropiane.