Një tërmet me magnitudë 7.8 ballë goditi sot Filipinet jugore, ku humbën jetën të paktën 5 persona, duke shembur ndërtesa dhe duke shkaktuar paralajmërime për cunami në të gjithë rajonin, njoftuan mediat lokale, duke cituar Shërbimin Gjeologjik të SHBA-së (USGS), transmeton Anadolu.
Valët e cunamit që arrijnë mbi 3 metra mbi nivelin e baticës janë të mundshme përgjatë disa brigjeve të Filipineve pas tërmetit masiv që goditi provincën Sarangani të ishullit Mindanao në det të hapur, sipas Qendrës së Paralajmërimit të Tsunamit të Paqësorit në SHBA.
Qendra Kërkimore Gjermane për Gjeoshkencat vlerësoi intensitetin e tërmetit në det të hapur në 8.2 ballë. Autoritetet po verifikojnë raportet për të paktën pesë vdekje në qytetin jugor General Santos.
Autoritetet në Filipine dhe Indonezi u kërkuan banorëve në rajonet e prekura bregdetare të lëvizin menjëherë në tokat më të larta. Një pasgoditje e fuqishme 6.1 ballë goditi zonën rreth dy orë pas tërmetit të parë, sipas USGS-së.
Tërmeti dëmtoi disa ndërtesa, klasa dhe objekte shkollore në pjesë të Mindanaos, duke detyruar pezullimin e shkollave, kontrollet e aeroportit dhe operacionet e reagimit emergjent në zonat e prekura, raportoi e përditshmja lokale “Philstar”.
Mësimi është pezulluar në të gjitha nivelet në zonat e prekura nga tërmeti në Mindanao.
Presidenti i Filipineve, Ferdinand Marcos Jr. udhëzoi agjencitë qeveritare të veprojnë menjëherë në reagimin ndaj fatkeqësive dhe operacionet e ndihmës. Autoriteti i Aviacionit Civil të Filipineve pezulloi përkohësisht operimet në aeroportin e qytetit General Santos pas tërmetit dhe paralajmërimit për cunami të lëshuar nga Phivolcs.
Agjencia japoneze e motit lëshoi një këshillë për cunami në brigjet e Paqësorit të Japonisë perëndimore dhe lindore. Një cunami me lartësi maksimale prej 1 metër mund të arrijë në ishullin Miyako dhe ishujt Yaeyama në Okinawa, njoftoi Agjencia e Lajmeve Kyodo, duke cituar Agjencinë Meteorologjike të Japonisë.
Agjencia i kërkoi popullatës të qëndrojë larg zonave bregdetare të prekura nga paralajmërimi derisa ai të hiqet.