🔒💻🛑 Ndalohet qasja për 33 faqe të tjera ilegale të lojërave të fatit online – numri total shkon në 307
Ministria e Transformimit Digjital ka ndaluar edhe 33 faqe të tjera ilegale për lojëra fati online, duke e çuar në 307 numrin e përgjithshëm të ueb-faqeve të bllokuara deri më tani.
Vendimi është nënshkruar nga ministri i Transformimit Digjital, Stefan Andonovski, i cili ka urdhëruar kufizimin e qasjes në këto faqe përmes rrjeteve publike të komunikimeve elektronike, në rastet kur konstatohet organizim i paligjshëm i lojërave të fatit online.
Sipas njoftimit zyrtar, urdhri i është dorëzuar Agjencisë për Komunikime Elektronike, e cila ka afat pesë ditë për ta përcjellë vendimin te operatorët përkatës dhe për ta zbatuar ndalimin teknik të qasjes.
Ministria thekson se kjo masë është pjesë e një aksioni të vazhdueshëm për luftimin e lojërave të paligjshme të fatit në internet, me synim mbrojtjen e qytetarëve, veçanërisht të të rinjve, si dhe rritjen e sigurisë në hapësirën digjitale.
Autoritetet paralajmërojnë se kontrollet do të vazhdojnë edhe në periudhën në vijim dhe se lista e faqeve të ndaluara do të përditësohet vazhdimisht në përputhje me gjetjet e reja.