Në një atmosferë të ndezur në Gjykatën Themelore të Strugës, u zhvillua seanca përmbyllëse e gjyqit ku kryetari i komunës Ramiz Merko paditi për shpifje dhe fyerje deputetin e VLEN-it, Bekim Qoku.
Gjykimi erdhi pas një postimi të Qokut në rrjetet sociale, ku ai shkruante: “Unë jam kundër korrupsionit,” duke akuzuar drejtpërdrejt Merkon për afera të dyshimta.
Merko, i cili e konsideron këtë një fushatë politike të motivuar, deklaroi se fjalët e Qokut i kanë shkaktuar dëme serioze emocionale dhe familjare:
“Nuk ka asnjë procedurë ndaj meje për korrupsion. Jam një kryetar komune, një familjar dhe biznesmen. Kam vuajtur psikologjikisht, nuk kam qenë në gjendje të punoj për tre muaj,” – tha Merko, duke përmendur se Qoku vepron në emër të Albin Kurtit.
Në anën tjetër, Qoku u mbrojt me një fakt të fortë:
Vetëm disa ditë pas deklaratës së tij, Departamenti Amerikan i Shtetit e vendosi Ramiz Merkon në listën e zezë për korrupsion, duke e shpallur person non grata.
“Unë i qëndroj fjalës sime. Postimi në Facebook ishte qëndrim personal, në interes të qytetarëve dhe transparencës. Korrupsioni, ndërhyrjet në drejtësi dhe ndërtimet e paligjshme janë dëm i drejtpërdrejtë për Strugën dhe gjithë vendin,” tha Qoku me bindje.
Merko kërkon dënim dhe një gjobë prej 30,000 denarësh për dëmtimin e nderit dhe reputacionit.
Përballja mes një kryetari të kontestuar dhe një deputeti që ngre zërin për transparencë, pritet të përfundojë me një vendim që mund të ketë jehonë më të gjerë politike dhe morale.
Vendimi i gjykatës pritet me shumë interes nga opinioni publik.